Võru kiilt või kõnõlda ka Kadrioro lossin…
…..nii ütel mi president Karisõ Alari Võro Instituudi 30. hällüpäävä peol timahava 21. urbõkuu pääväl.
Säändse jutu pääle tull vesi silmänukka, kuna esi olõ umal aol võru keele kõnõlõmisõ peräst koolin nukan saisnu.
Sõnavõtjit sääl peol oll mitmit. Instituudi parhillanõ direktri Padari Ivari nimmäs uman terütüskõnõn , et puul Instituudi eloaost (ehk 15 aastakka) omma juhiuhja olnu Kuuba Rainõri käen. Ülejäänü aig om mitmõ juhi vaihõl jagunu. Üts noist kunagidsist direktrist Kama Kaido kõnõl Võro liikmisõ ja Võro Instituudi aoluust. Tiidüsmiis Pajusalu Karl kai uman etteastõn Võro Instituuti ku soomõ-ugri kiili uurmiskeskust. Kalla Urmas selet Võromaa jutussõraamatist. Otsa Mirjami teemas olli muuseumi`, mis om üts osa Võro Instituudist. Jüvä Sullõv sai sõnna võro keele uurmisõ ja arõndamisõ teemal. Saarõ Evar nimeuurmisõ teemal. Perämädses etteastõs tull kõnõpulti Fasteri Mariko jutuga võro keele ja kultuuri oppusõst latsiaian ja koolin.
Päivä vidäsivä tubli` noorõ`, rahvarõivin neio` Raju Eliisabet ja Saarõ Hipp. Hüä võru kiil suun.
Ku nä olli söögivaihõ vällä kuulutanu, läts kõvas Savvusanna lavvamängus. Tuu vagivahtsõnõ ja mitmõ inemise (Piiri Helen, Laanõ Triinu, Margna Epp jt) puult vällämõtõldu ja kujundõt põnnõv mäng oll ka raamatidõ müügilavval välän.
Mi TVS-i kolmõliikmõlinõ esindüs (Mõtsalliku Eva, Müürsepä Külli ja Orioni Jana) ollimi kah nõnnapiten lavvamängu man, a vaihõaig sai inne otsa ku meil mäng selges. Tull kodo üten osta ja edesi uuri, kuna säänest mängu olõ-õi terven ilman. Varsti pidi ammõtligult puuti müüki kah tulõma.
Ku kõik sõnavõtu läbi olli, tull kingitüisi kätteandmisõ aig. Eva oll tennü Rõugõ rahvarõiva mustriga kandõkoti, kohe sisse pandsõmi uma raamadu „Tallinna Võru Selts 30“ ja rahvatandsjidõ pildiga kompvekikarbi. Üle sai antus ka häitsev potiruus.
Kuna ollimi kolmõkõistõ, paistu paslik olõvat alosta lauluga „Mi kolmõkõistõ tulõmi, Tallina liina päält, mi tervüst teile soovimi ja kõkkõ-kõkkõ hääd“. Rahvas lei tuu pääle kässi kokko.
Sis sai tettüs väiku kaehus aolukku, kuis urbõkuu 14. pääväl 1995. aastagal näkse ilmavalgust Võro Instituut, a viis aastakka varrampa 1990. a mahlakuu 8. pääväl Tallina Võro Selts. Miä tuu tähendäs?
Tuu tähendäs, et Võro Instituut om väikuveli, a TVS om vanõmb sõsar. Miä tuu tähendäs?
Tuu tähendäs, et mi olõmi üts pere. Miä tuu tähendäs? Tuu tähendäs, et mi piät kokko hoitma ja ütstõist tugõma, selle et tsiht om meil üts: et esämaa ja imäkiil kavvas, kavvas jäänü viil.
Müürsepä Külli
