EKSÜ SUVÕKUUL OBINITSAN 1-4 PÕIMUKUUN 2024
01-04 põimukuul peeti timahava Obinitsan EKSÜ suvõkuuli, kohe ma ka hinnäst sisse osti ja sai 10 kotusõlidsõn majotuspaigan alomidse riiuli pääl 3üüd maka.
Sääne majotus om väega hää, saat rutõmb inemiisiga tutvas ja teedä, kost nä omma ja midä tegevä.
Suvõkuuli oll kokko tulnu üle 60 inemise üle maailma.olõvist Eesti seldsest.
Oll Vinnemaalt Moskvast ja Peterburist, Krasnojarskist, Soomõst, Rootsist, Abhaasiast, Gruusiast, Hollandist, Sveitsist ja Austraaliast.
Tulõkupäävä päälelõunal kõnõl Rauni Eero Integratsiooni Sihtasutusõst “avatu päävä ideest”, kos seldsi saava hinnäst tutvusta.
Õdagu läts pill Aleksandri käen mängmä ja Mariina lei tandsu. Nimä ollivagi üte värikämbä tüübi Peterburist. Mii tõõsõ leimi ka lusti, laulsõmi ja tandsõmi näidega üten.
Järgmidsel pääväl oll ekskursioon Toomiku Siiri käe all. Kävemi Värska Pühä Jüri kerigun, Saatsõ muusõumin ja Jumalamäe pääl, teimi ütidse pildi Vabahussõa avvusamba man ja kävemi ka Vana Jüri seebipoodin.
Tüü käve pääle lõunat edesi, ku Tšehhi Eesti Seldsi Zajedova Iivi kõnõl suurpagõmisõ 80 aastapääväst. Haukanõmmõ Kaja kõnõl diasporaa kujonõmisest ja arhiivõist. Mõtusõ Marin ja Viiese Liina Välisministeeriumist teivä ettekandõ ” Eesti Üleilmakülä XXI aastasaal, mis om teoksil, kohe mindäs ja midä tetäs. Kohe mii sis läämi? Ku ESTO järgmine aasta peetäs Stockholm-Narva- Tallinn liinil, sis kohe mii võisi minnä uma esindusõga?
Sis tull päävä “pauk”, ku nuur mulk Liiberi Robin lavalõ lasti. Tä tõmmas seminaari korgõ tuuri pääle käümä teemaga ” Kuis hoita umma hindätiidvüst?”.
Puulpäiv oll Setomaa Kuningriigi päiv ja ka vahtsõ sootska valiminõ. Mii lätsimi uma üümaja paigast uhkõn rivin muusõumi poolõ, koh näüdäti meile seto naasõ ja mehe rõivilõpandmist mii Rootsi noorigu Sirle ja Johansoni Antsu pääl.
Hao Paul kõnõl meile Seto leelost ja tuu ülesehitüsest. Saimi ka uma helü vallalõ. Teimi ütispilti uma puhkõtalo saina veereh koh olli taustas Seto mustri ja sis lätsimi kuningriigi programmi kaema.
Sääl sai maitsa sõira ja leibä, juvva hansat ja taari. Oll leelot, kargust, tandsu ja pillimängu. käsitüüd ja kõkkõ muud. Vaihõpääl sai hinnatus ka karikatuurinäütüst ja õdagu, kiä jõudsõ, massulidsõlõ peräpidolõ Ilmaveere pernaasõ kontserdilõ. Kiä jõudsõ, käve ka järven tsuklõman ja tandsu vihtman.. Mul oll tuus aos jo toss välän.
Kõkkõ rohkõmp miildü mullõ tuu noorõ mulgi etteastõ, kiä es olõki mulk, a kiil oll suuh ja kuub säläh ja kiä süämest ai “mulgi asja”.
Tä jutust võti ma kah nüüd hindäle lõugahusõs, et ku sa esi hinnäst ei näütä, sis kiäki sinno ei näe.
Ma kai ja näi ja kasu ka tuust sai
Plumanni Kaja-Riina
Talina Võru Seldsi kultuuriministri
