Talina Võru Seldsi tüü lätt suvõlgi edesi
Noid, kiä Kõivupuu Marjut ei tiiä om veidü. Noid, kiä tedä tiidvä ja kullõlda tahtva om hulga.
Tuntu kultuuriluulasõ, kiräniku, folkloristika aastapreemia laurõaadi ja rahvapärimusõ uurjaga kokkosaamist olõmi kavva ja kannatligult uutnu.
Timahava 20. hainakuun koitsõ ummõhta tuu päiv , ku Talina Võru Seldsil oll kokkosaamine Kõivupuu Marjuga.
Kokko oll lepitu jutu pääteema– kõnõlda eesti rahva tähtpäivist. Tartu Ülikoolin filoloogi haridusõ saanuna „jakku juttu kavvõmbas“. Saimi teedä põnõva tõsiasagi, et teno timä ja tõõsõ mi seldsi liikmõ-Tootseni Toivo iistvidämisele saimi kallendrihe üte puhkõpäävä manu.
Jutt läts ka Eesti ja ültse Soomõ-ugri rahvidõ kommõtõ, keele ja eloviisi pääle. Oll küsümüisi ka suidsusanna maailma kultuuriperändihe kandmisõst. Küsümüs oll tagamõttega, kuna Marjulõ oll kingis mõtõldu seldsi näpotüünaase Mõtsalliku Eva puult valmistõt sannamüts ja sannalava pääl istmisõ aluslina. Kingitüs tekse esinejalõ suurt rõõmu, kuna tä noist asjust õkva kõnõl.
Miilde jäi ka Marju puult nimmätü tõsiasi, et paljo` kallendriga köüdet tähtpäävä` tulõnõsõ vanast kallendrist ja ku tuud kuupäivä rakõndat vahtsõ kallendri perrä, siss om viga kats nädälät aoliselt varahamp. Et ku säitsmevele vai säitsme magaja päiva seostõdas vihma sadamisõ vai mittesadamisõga säidse nädälät , siss tuud nigu ei olõs õigõ vahtsõ kalendri perrä kaia. A jaanipäivä võit külh pitä vana kallendri perrä, nigu setodõl om, a õigõmb om ta õks vahtsõ perrä, ku päiv om kõgõ pikemb ja üü kõgõ lühemb.
Marju jutust saimi tiidä todagi, et Põhja- ja Lõuna- Eesti keele ütes olulidsõs erinõvusõs om asaolu, et Põhja-Eesti rahvaluulõ või olla regivärsiline, a Lõuna-Eesti keele jaos tä häste ei passi.
Kõivupuu Marju om pia puul aastakka olnu võru keele iistkõnõlõjas.
Jutu lõpun andsõ tä uma võru keele iistkõnõlõja rekvisiidi`- puidust tettü ruupori, kon 8 kihlkunna nime` ja mustri` pääl, kaalaraha ja valitsuskepi üle Müürsepä Küllile, kiä om joba neläs TVS-i liigõ, kinkalõ sääne tunnustus osas om saanu.
Vahtsõnõ iistkõnõlõja lubasi seldsi rahvast truilt edesi tiini ja ammõdiao kestel raamadu ja DVD „Kolm hinnapakmist sõnan ja pildin“ valmis saia.
TVS-i esimiis
Müürsepä Külli
