Talina võrukõsõ katsõva Tartu Kammivabrigun lavva 19.rehekuu pääväl 2024
Kuna Talina ja Harjumaa kultuuriseltse Vallaliidsi Ussi Päiv 22. süküskuul Sakalan läts kenäste, arvas juhatus, et TVS-i tulõs tutvusta kah säändsel üleriigilidsel ettevõtmisõl 19. rehekuul Tartun.
Mõtsalligu Eva kor`as kokko näpotüünaisi “varandusõ”, Müürsepä Külli otsõ üles TVS-i puult vällä antu raamadu`, plaadi`, lauligu jm. ja säläkoti` säläh, sõidimi bussiga Tartu Kammivabriguhe.
Meile anti 2 lauda välläpanõkidõ jaos ja nuu saiva tävveste är katõtus asjuga.
Edimädse asana pandsõmi Liiso plaadi mängma (mängumassin oll hindäl üten võetu)
ja terve saal sai võrukiilset laulu täüs.
Keskpääväl nakas messi “Pilli` kotti” loengide tsükli pääle. Põhiteemas iks küsümüs, et määne om eesti rahvakultuuri tulõvik? Kas ja kuis mõotas mi rahvakultuuri parhillanõ kärpeplaan?
Edimält kõnõl mii kandi miis Valnõri Sullõv, kiä om parhilla Regionaal- ja põllumajandusministeeriumi KOV-i osakunna piirkunnajuht.
Sulevi jutu mõtõ oll : “Pilli` julgõhe hüüdmä”
Sis oll jutujärg Visteri Kalle käen Eesti Rahvakultuuri Keskusõst teemaga
“ERK täämba ja hummõn”. Oll hää miil nätä silmäst silmä miist, kiä om andnu uma allkirä ka mii projekte taotluisilõ.
Järgmidse esinejä suust sai kuulda vahtsõt sõnna “säilenõtkus”
Evelyn Härm (Eesti Linnu ja Valdu Liit) tull vällä teemaga“Säilenõtkõ rahvakultuur ja rahvamaja kohaligun umavalitsusõn”. Hulga aigu mõtli, kuis taad sõnna võru kiilde panda. “Ellojäämise kunts” olnu vast kõõ täpsemb tõlgõ, a om pikävõitu. Kiä pakk paremba, saa avvuhinna!
Päävä lõpus pidi “rassõkahurvägi” sõnasõta, kon kõnõldi rahvakultuuri tulõvikust, rahastusõst ja võimalikõst arõnguist:
– Priit Lomp – Riigikogu majanduskomisjoni esimiis ja rahanduskomisjoni liigõ
– Aavo Kokk – Siuru juht
– Ants Johanson – Tartumaa Rahvakultuuri Keskseltsi juhatusõ liigõ
– Arotlust vidi Eero Raun – Kultuuririkkuse Aasta juht
Juttõ vaihõlõ tandsõ ansambli Salome väega ilosid ja eriperätsid tandsõ.
Terve päiv tutvusti seldsi` umma tegevust, paksõva ka umatettü söögi- ja joogipoolist.
Rauni Eero käve lavvast lauda ja tekse mikrohvoni ja kaameramehega intervjuusid.
Eesti Kirändüse Selts andsõ teedä, et 2025 om Raamaduaasta ja et edimäne eestikeeline raamat saa 500 aastadsõs. Mii umalt puult nõstimi vastakaalus üles seldsi liikmõ Einasto Reinu(Paevana) trükülämmä teosõ “Kivin om elu ja mõtiskelu”.
Kõik seldsi`(näid om üle 50) es olõ Tartulõ kohalõ tulnu`, inämbüs tekse paigapäälidsõlt ussõ vallalõ. Kammivabrigun olnuist tundu külh TVS-i laud kõgõ rikkaligumb olõvat.(Pini handa tulõ õks pinil hindäl nõsta).
Kaimi-näimi tõisi ja näütsimi hinnäst. Näimi är kah tuu kuulsa katlamaja korstna, mis Kammivabrikuhe sõitõn oll viil 90m, a tagasi tullõn oll täst perrä õnnõ 15m korgunõ jalakõnõ (nigu saatõn Inne ja Peräst).
Säändse 2 tähtsät sündmüst Tartun ütel pääväl.
27.10.24
Müürsepa Külli
